„Радувај се, свештени уме, чисто живеалиште на Света Троица, црковен столбу, тврдино на верните, помош на поразените, ѕвездо која со твоите од Бога примени молитви постојано ги разоруваш опасностите и мракот на болките, светителу Николае; тивко пристаниште во кое се спасуваат оние што ги носи животната бура: Моли Го Христа, да им даде на душите наши милост голема“ (стиховна стихира на Вечерна на свети Николај Мирликиски Чудотворец).

 

На 19.12.2016 година, денот кога го прославуваме споменот на великиот равнител за верата и правилото на кротоста, светиот Николај Мирликиски Чудотворец, во храмот „Св. Никола Геракомија“ во Охрид, беше отслужена света архиерејска Литургија, на која чиноначалствуваше Неговото Високопреосвештенство Митрополитот Дебарско-кичевски г. Тимотеј, во сослужение на архимандритот Партениј, протоерејот Никола Христоски, свештеникот Љупчо Симиџиески, еромонахот Доситеј, протоѓаконот Николче Ѓурѓиноски и ѓаконот Сашо Целески. По завршувањето на Литургијата, Митрополитот Тимотеј се обрати пред многубројниот верен народ со пригодна беседа, која во продолжение во целост ви ја пренесуваме. По Литургијата, во резиденцијата на Митрополитот Тимотеј, а по повод куќната слава на Митрополитот, беше прекршен празничниот колач. Од името на свештенството и монаштвото од нашата епархија, како и од сиот верен народ, му ја честитаме славата на Митрополитот Тимотеј, со желби и молитви уште многу години да го прославува светиот Николај, а тој да му дава сила и мудрост на нашиот духовен пастир да нѐ води на патот кон спасението. На многаја лета!

Повеќе...

„По целата земја се разнесе гласот за твојот доблесен живот, пресвет отче, затоа на небесата доби награда за своите подвизи. Си ги погубил легионите демонски, а живеејќи како ангел живот непорочен си ги достигнал дури и ангелските чинови. Бидејќи можеш, застани пред Христа Бога и моли Го да им подари мир на нашите души“ (стихира по Евангелие на утрена на преп. Нектариј Битолски).

 

Празнувањето на преподобниот Нектариј Битолски и преп. Сава Осветен, започна со свечена воскресно празнична Вечерна богослужба, на 17.12.2016 година, во капелата „Св. Кирил и Методиј“ во манастирот „Св. Наум Охридски“ во Охрид. На Вечерната богослужба чиноначалствуваше Неговото Високопреосвештенство Митрополитот Дебарско-кичевски г. Тимотеј, во сослужение на архимандритот Нектариј, игумен на манастирот, протоерејот Никола Христоски, свештениците Димче Азески и Владо Недески, протоѓаконот Николче Ѓурѓиноски и ѓаконот Сашо Целески. По завршувањето на Вечерната, беше прекршен и празничниот колач во слава и чест на преподобниот Нектариј, а по повод именденот на архимандритот Нектариј.

Повеќе...

На 06.12.2016 година, се упокои во Господа свештеникот Марко Трпкоски од Македонски Брод. Отец Марко е роден во 1960 година, од благочестиви родители во селото Брест, Македонски Брод. Завршил во МПБ „Св. Климент Охридски“ во Скопје, а по стапувањето во брак, во 1982 година, најпрво е ракоположен за ѓакон, а потоа и за свештеник, во храмот „Успение на Пресвета Богородица“ во Македонски Брод, каде служеше до неговото упокојување. Опелото на отец Марко го изврши Неговото Високопреосвештенство Митрополитот Дебарско-кичевски г. Тимотеј, во сослужение на повеќе свештенослужители од нашата Епархија, на 07.12.2016 година во храмот „Успение на Пресвета Богородица“ во Македонски Брод, каде што и свештеникот Марко веќе 34 години верно служеше на Македонската православна црква и на Бога. Митрополитот Тимотеј се обрати кон ужаленото семејство и кон присутните со пригодна беседа, која ви ја пренесуваме во целост.

Повеќе...

„Духовно поткрепуван, си ги презрел болките што ти биле нанесувани со разните средства (за мачење), поради тоа што не им принесуваше пофалба на глувите идоли, туку на Христа Бога. Откако со љубов ја сочува верата во Него, Георгие, си говорел: Дела Господови, пејте Му на Господа, и превозносете Го во сите векови“ (песна од канонот на Утрена на св. вмч. Георгиј).

 

На 09.12.2016 година, денот кога го празнуваме споменот на св. вмч. Георгиј и преп. Алимпиј Столпник, во храмот „Св. вмч. Георгиј“ во Охрид, беше отслужена света архиерејска Литургија, на која чиноначалствуваше Неговото Високопреосвештенство Митрополитот Дебарско-кичевски г. Тимотеј, во сослужение на протоереј-ставрофорите Сашо Богданоски и Димче Ѓорѓиески, протоереите Никола Христоски и Игор Никовски, свештениците Димче Азески, Љупчо Бакрачески и Зоран Ставрески и протоѓаконот Николче Ѓурѓиноски. По завршувањето на Литургијата, Митрополитот Тимотеј се обрати кон многубројниот верен народ со пригодна беседа, која интегрално ви ја пренесуваме.

Повеќе...

„Откако си проникнал во бездната на Божјата Премудрост, оттаму си го нацрпил богатството на божествените Писанија, со кое, Клименте семудри, елинскиот глас си го појаснил со македонскиот јазик. Затоа со љубов те славиме“ (стихира по Евангелие на утрена на свети Климент Охридски).

 

Рамноапостолниот ревнител, Климент Охридскиот Чудотворец, безброј луѓе изведе од прелеста, непрестајно поучувајќи ги во законот Божји и со својот чесен живот упатувајќи ги кон божествената наслада. Затоа, и ние денес, со љубов го славиме споменот на светиот епископ наш Климент, кој ја преведе во вистинската вера цела Македонија.

 

Празнувањето на споменот на светиот Климент започна ден претходно, во манастирот „Св. Климент и Пантелејмон“ Плаошник во Охрид, со свечена Вечерна богослужба, на која чиноначалствуваше Неговото Високопреосвештенство Митрополитот Дебарско-кичевски г. Тимотеј, во сослужение на протоереј-ставрофорите Сашо Богданоски и Димче Ѓорѓиески, протерејот Никола Христоски, свештениците Димче Азески, Горан Ставрески и Роберт Илијевски, протоѓаконот Николче Ѓурѓиноски и ѓаконот Сашо Целески. По завршувањето на Вечерната, пред моштите на светителот, беше отслужен и Молебен на свети Климент Охридски.

Повеќе...
Страница 6 од 144

Fotogalerija

galerija

Izdava{tvo

izdavastvo

Crkoven kalendar

Март 2015
Пон Вто Сре Чет Пет Саб Нед
23 24 25 26 27 28 1
2 3 4 5 6 7 8
9 10 11 12 13 14 15
16 17 18 19 20 21 22
23 24 25 26 27 28 29
30 31 1 2 3 4 5