НАЈНОВО ОД ДЕБАРСКО-КИЧЕВСКАТА ЕПАРХИЈА

„Колку што Пресветиот Дух ти даде да претскажуваш, сечесни пророче Илија, си претскажал за доаѓањето на Синот Божји, и не си погрешил, себлажени. Нему ние Му пееме: Боже на нашите татковци, благословен си“ (песна од канонот на Утрена на св. пророк Илија).

Празникот на светиот пророк Илија и на светите Пречистански преподобномаченици Евнувиј, Пајсиј и Аверкиј, како и на празникот на нашата држава - славниот ден Илинден, и оваа година беше свечено одбележан и прославен во манастирот „Пресвета Богородица - Пречиста“ во Кичево. Празнувањето започна на 01.08.2024 година, во вечерните часови, со празнична вечерна богослужба, на којашто чиноначалствуваше Неговото Високопреосвештенство Митрополитот Плаошко-струшки и Дебарско-кичевски и Администратор Австралиско-сиднејски г. Тимотеј, во сослужение на протоереј-ставрофорот Никола Христоски , еромонахот Ефросиниј, свештеникот Александар Матески и протоѓаконот Николче Ѓурѓиноски. По завршувањето на Вечерната богослужба, беше отслужен Парастос за покој на душите на сите борци кои ги дале своите животи во одбрана на нашата Црква и Татковина. 

Торѓествата продолжија утредента, на 02.08.2024 година, со отслужување на света архиерејска Литургија, на којашто чиноналаствуваше Митрополитот Тимотеј, во сослужение на протоереј-ставрофорот Никола Христоски, еромонахот Ефросиниј, свештеникот Александар Матески и протоѓаконот Николче Ѓурѓиноски. По завршувањето на Литургијата беше осветено празничното коливо, а беше прочитано и Илинденското послание, испратено до сите верни чеда од Архиепископот Охридски и Македонски и на Јустинијана Прима г.г. Стефан, заедно со членовите на САС на МПЦ-ОА. Истото ви го пренесуваме во целост.

„Си воскреснал денес од гробот, Штедар, и нас си нѐ извел од смртните врати. Денес Адам ликува и се радува Ева, а пророците, заедно со патријарсите, непрестајно ја воспеваат моќта на власта Твоја“ (воскресен кондак, глас 3-ти).

На 21.07.2024 година, во Четвртата недела по Педесетница и на празникот на св. вмч. Прокопиј Кесариски и на преп. Теофил Мироточив, во храмот „Св. пророк Илија“ во с. Јабланица, Струга, беше отслужена света архиерејска Литургија, на којашто чиноначалствуваше Неговото Високопреосвештенство Митрополитот Плаошко-струшки и Дебарско-кичевски и Администратор Австралиско-сиднејски г. Тимотеј, во сослужение на протоерејот Митре Попоски, свештениците Роберт Илијевски, Ристе Наумоски и Христијан Костоски и протоѓаконот Николче Ѓурѓиноски. Повод за оваа служба беше и неодамнешниот роденден на протоерејот Петар Петрески, кој го прослави својот 100 роденден. Митрополитот Тимотеј, заедно со свештениците, по Литургијата го посети отец Петар во неговиот дом, со желби и молитви Господ да го поживее уште многу години. По завршувањето на Литургијата, Митрополитот Тимотеј се обрати кон верниците со пригодна беседа, којашто интегрално ви ја пренесуваме. 

„Реките со чудеса, Богородице, кои течат од од твојот сечесен ковчег како од рајот и кои им излеваат благодети на оние кои те почитуваат верно, го напојуваат лицето на земјата. Затоа те воспеваме, и верно те фалиме, и со благодарност постојано викаме: Радувај се, единствена надеж на оние кои те воспеваат!“ (седален на канон на Утрена на празникот Полагање на чесната риза на Пресвета Богородица во Влахерна).

Една година по преосветувањето на манастирскиот храм „Пресвета Богородица Захумска“ - Заум во Трпејца, еве Господ благослови повторно да го прославиме востановениот манастирски празник Полагање на чесната риза на Пресвета Богородица во Влахерна. Празнувањето на Мајката Божја, започна ден претходно, на 14 јули 2024 година, во вечерните часови, со Празнична вечерна богослужба, на којашто чиноначалствуваше Неговото Високопреосвештенство Митрополитот Плаошко-струшки и Дебарско-кичевски и Администратор Австралиско-сиднејски г. Тимотеј, во сослужение на свештеникот Александар Матески и ѓаконот Марко Спасовски. Празнувањето продолжи на 15 јули, со света архиерејска Литургија, на којашто чиноначалствуваше Митрополитот Тимотеј, во сослужение на протоерејот-ставрофор Никола Христоски, свештениците Александар Матески, Љупчо Бакрачески и Роберт Илијевски и ѓаконот Марко Спасовски. По завршувањето на Литургијата, Митрополитот Тимотеј се обрати кон верниците со пригодна беседа, којашто ви ја пренесуваме во целост.

„Хорот на светите се радува во вековите, зашто го наследија Царството Небесно; земјата, откако ги прими нивните мошти, изпушта блага миризба; откако се вселија во вечниот живот, станаа слуги Христови“ (хвалитна стихира на Утрена на св. бесребреници Козма и Дамјан).

.На 14.07.2024 година, кога го славиме споменот на светите бесребреници и чудотворци Козма и Дамјан, Римските маченици, во храмот „Св. Козма и Дамјан“ („Св. Врачи“) во Пештани, Охрид, беше отслужена света архиерејска Литургија, на којашто чиноначалствуваше Неговото Високопреосвештенство Митрополитот Плаошко-струшки и Дебарско-кичевски и Администратор Австралиско-сиднејски г. Тимотеј, во сослужение на архимандритот Нектариј, протоереј-ставрофорите Никола Христоски и Ристе Ристевски, свештениците Атанас Казанџиски и Димче Азески и протоѓаконот Николче Ѓурѓиноски. По завршувањето на Литургијата, беше извршен чинот на Мал водосвет и беше прекршен празничниот колач, а Митрополитот Тимотеј се обрати кон верниот народ со пригодна беседа, којашто интегрално ви ја пренесуваме.

„Сигурните и богогласни проповедници, врвот на апостолите Твои, Господи, си ги примил во наслада и покој на Твоите добра, бидејќи нивните страдања и смрт си ги примил подобро од секоја првина, Ти, Кој единствен знаеш да ги читаш срцата на луѓето“ (кондак на Утрена на св. ап. Петар и Павле).

На 12.07.2024 година, денот кога го прославуваме споменот на светите славни, сефални и првоврховни апостоли Петар и Павле, во храмот „Св. Петар и Павле“ во Кичево, беше отслужена света архиерејска Литургија, на којашто чиноначалствуваше Неговото Високопреосвештенство Митрополитот Плаошко-струшки и Дебарско-кичевски и Администратор Австралиско-сиднејски г. Тимотеј, во сослужение на протоерејот-ставрфор Никола Христоски, свештениците Александар Матески и Александар Крстаноски и протоѓаконот Николче Ѓурѓиноски. По завршувањето на Литургијата, беше извршен чинот на Мал водосвет и беше прекршен празничниот колач, а Митрополитот Тимотеј се обрати кон верниците со пригодна беседа, којашто интегрално ви ја пренесуваме.