НАЈНОВО ОД ДЕБАРСКО-КИЧЕВСКАТА ЕПАРХИЈА

„Премудри Атанасие, со твојот жезол си ги протерал духовните волци од Црквата Христова, и си ја заградил со тврдината на твоите зборови, и на Христа си Му ја претставил непоклатна и непоколеблива. Него моли Го, да се избавиме од неволји ние, коишто твојот сечесен спомен со вера го славиме“ (хвалитна стихира на Утрена на св. Атанасиј Велики).

На 15.05.2023 година, денот кога го прославуваме споменот на светиот Атанасиј Велики, во ман. „Св. Атанасиј Велики“, метох на манастирот „Св. Наум Охридски“ во Охрид, беше отслужена света архиерејска Литургија, на којашто чиноначалствуваше Неговото Високопреосвештенство Митрополитот Плаошко-струшки и Дебарско-кичевски и Администартор Австралиско-сиднејски г. Тимотеј, во сослужение на архимандритот Нектариј, протоерејот-ставрофор Никола Христоски и ѓаконот Марко Спасовски. По завршувањето на Литургијата, беше извршен чинот на Мал водосвет и беше прекршен празничниот колач, а Митрополитот Тимотеј се обрати кон верниците со пригодна беседа, којашто ви ја пренесуваме во целост.

„Господи, Кој си живот и извор на бесмртноста, си седнал при изворот, Штедре, и со Твоите премудри води си ја исполнил Смарјанката која бараше од Тебе, и која Те воспеваше“ (песна од канонот на Утрена во Петтата недела по Пасха - на Самарјанката).

На 14.05.2023 година, во Петтата недела по Пасха - Неделата на Самарјанката и на празникот на св. пророк Еремија, Неговото Високопреосвештенство Митрополитот Плаошко-струшки и Дебарско-кичевски и Администратор Австралиско-сиднејски г. Тимотеј, во сослужение на протоерејот-ставрофор Никола Христоски, протоерејот Стевчо Тошевски, свештеникот Александар Матески и протоѓаконот Николче Ѓурѓиноски, изврши осветување на храмот „Св. Атанасиј Велики“ во с. Миокази, Кичево. Храмот е обновен во 1935 година, а во последниве години, по иницијатива на Црковниот одбор од селото и со донациите на месното население и на сите добронамерни верници, беше повторно реновиран и разубавен. По осветувањето, беше отслужена и света архиерејска Литургија, а на крајот, Митрополитот Тимотеј се обрати со пригодна беседа пред насобраниот верен народ, којашто интегрално ви ја пренесуваме.

„Благородна нива Христова си бил, Георгие, обработена со маченички подвизи и, како преславно богатство, Судијата те положи во небеските ризници, поради твоите извонредни успеси“ (песна од канонот на Утрена на св. вмч. Георгиј).

Воскреснатиот Христос и оваа година благослови и н даде можност уште еднаш да земеме учество во еден од најторжествените настани во нашата Епархија - свечената струшка литија - еордија, на која илјадници верници од сите краишта, со радост и велелепие го величаат Воскреснатиот Спасител, како и нашиот постојан застапник пред Севишниот Бог - великомаченикот и победоносец Георгиј. Според обичајот, најпрво беше отслужена празнична Вечерна богослужба, на којашто чиноначалствуваше Неговото Високопреосвештенство Митрополитот Плаошко-струшки и Дебарско-кичевски и Администратор Австралиско-сиднејски г. Тимотеј, во сослужение на Неговото Високопреосвештенство Митрополитот на Имврос и тендос г. Кирил (од Вселенската патријаршија), Неговото Преосвештенство Епископот Антаниски г. Партениј, архимандритот Нектариј, протоереј-ставрофорите Никола Христоски и Александар Димоски, свештеникот Христијан Костоски, протоѓаконот Николче Ѓурѓиноски и ѓаконот Марко Спасовски. По завршувањето на Вечерната богослужба, беше отслужен Парастос за сите порано упокоени ктитори, свештенсослужители и приложници на струшкиот храм, а на Парастосот учество зедоа и свештениците Ѓорѓи Блажевски и Љупчо Бакрачески. По завршувањето на Парастосот, Митрополитот Тимотеј се обрати кон неизбројниот верен народ со пригодна беседа, којашто подолу во целост ви ја пренесуваме. Потоа верниот народ, предводен од архиереите, свештенството и монаштвото тргна на свечената литија низ градот Струга, носејќи ги светителските мошти и чудотворната икона. Оваа година честа да ги носат моштите ја имаа: Илија Ѓорѓиевски, Сашо ДОнев, Ристе Талевски и Гоце Симјаноски. Иконата ја носеа: Бојан Стојаноски, Владо Затаракоски, Стефан Андоновски и Арсениј Карамитре. Литијата беше збогатена и со звуците на Градскиот оркестар од Скопје, а неизбројниот верен народ се наслади и со прекрасниот настап на членовите на ансамблот „Македонија“. Во продолжение ви ја пренесуваме беседата од Митрополитот Тимотеј.

„Дојдете сите народи, дознајте ја силата на страшната тајна, зашто Христос, нашиот Спасител - Словото, Кое беше во почетокот, заради нас се распна и добороволно се погреба, и воскресна од мртвите за да ја спаси вселената. Нему да Му се ппоклониме“ (хвалитна стихира на Утрена во Четврта недела по Пасха).

На 07.05.2023 година, во Четвртата недела по Пасха - на раслабениот, и денот по споменот на св. вмч. Георгиј Победоносец, кога Струга и сите православни верници од поширокта околина се подготвуваат за торжествената струшка литија во спомен на Воскреснатиот Спасител и во спомен и чест на св. вмч. Георгиј, во храмот „Св. вмч. Ѓорѓи“ во Струга, беше отслужена света архиерејска Литургија, на којашто чиноначалствуваше Неговото Високопреосвештенство Митрополитот Плаошко-струшки и Дебарско-кичевски и Администратор Австралиско-сиднејски г. Тимотеј, во сослужение на нашиот почитуван гостин од Вселенската патријаршија, Неговото Високопреосвештенство Митрополитот на Имврос и Тендос г. Кирил, архимандритот Нектариј, протоереј-ставрофорите Никола Христоски, Илија Танаскоски и Александар Димоски, протоерејот Васко Голабоски, свештеникот Христијан Костоски, еромонахот Никодим, протоѓаконот Николче Ѓурѓиноски и ѓаконот Марко Спасовски. По завршувањето на Литургијата, Митрополитот Кирил го дарува нашиот Митрополит Тимотеј со прекрасна панагија, а свештенството од Струга му се заблагодари на нашиот ценет гостин за неговата посета и Литургиско сослужение, подарувајќи му прекрасна панагија. На самиот крај, Митрополитот Тимотеј се обрати кон верниот народ со пригодна беседа, којашто ви ја пренесуваме во целост. 

„Дојдете сите вие што го славите сепразничното, светло и славноВоскресение, пак да го празнуваме светлото торжество на маченикот Георгија, и со пролетни цветови, како непобедлив, да го овенчаме, та, по неговите молитви, да примиме избавување од неволјите и од гревовите“ (хвалитна стихира на Утрена на св. вмч. Георгиј - Ѓурѓовден).

На 06.05.2023 година, денот кога го прославуваме споменот на светиот великомаченик и победоносец Георгиј, во храмот „Св. вмч Ѓорѓи“ во Охрид, беше отслужена света архиерејска Литургија, на којашто чиноначалствуваше Неговотот Високопреосвештенство Митрополитот Плаошко-струшки и Дебарско-кичевски и Администратор Австралиско-сиднејски г. Тимотеј, во сослужение на многупочитуваниот Митрополит на Имврос и Тендос г. Кирил од Вселенската патријаршија, архимандритот Нектариј, протоерејот-ставрофорите Никола Христоски, Сашо Богданоски и Димче Ѓорѓиески, свештениците Горан Ставрески и Ѓорѓи Блажевски, протоѓаконот Николче Ѓурѓиноски и ѓаконот Марко Спасовски. Тука му искажуваме и голема благодарност на Неговата Сесветост Вселенскиот Патријарх г.г. Вартоломеј, кој благослови да го испрати во овие воскресенски и празнични денови многупочитуваниот Митрополит на Имврос и Тендос г. Кирил, та како еден народ Христов заедно да Му благодариме на Господа и да земеме учество во светата Чаша. По завршувањето на Литургијата, беше извршен чинот на Мал водосвет и беше прекршен празничниот колач, а Митрополитот Тимотеј се обрати кон многубројниот верен народ со пригодна беседа, којашто интегрално ви ја пренесуваме.